NAZIV I SADRŽAJ - Copyright by Elfrida M.Mahulja
DON'T WORRY BE BODUL!
URA
Blog
subota, kolovoz 1, 2009


gren spat
pomolit se anđelu čuvaru
provat ću se večeras
dogovorit s njin

neka me leh poštedi sni

želin mozak znet z glave
vanka
položit ga na komodinu
ne mislit niš

odmorit
spat
ne bit
ne postojat

niš
škuro
mrak

i otvorena puneštra
ZRAK!

Elfrida Matuč-Mahulja/Krk
Poetessa @ 21:07 |Komentiraj | Komentari: 3 | Prikaži komentare
petak, veljača 15, 2008


kada se dogodilo da smo romantiku pušćali pobić z ruku
kako dica kih je mat poslala po provištu
bez takujina
(domišljan se pedeset dinari stišnjenih va šaku
a dite kako dite hodi z nikon mišlju i ćapuje leptiri va zraku
sve drugo znate...)
kada se dogodilo da smo pozabili romantiku
i da nas je sran prošećat se po rivi prekriženih prsti
kada se dogodilo da je zamuknul smih od judi
i kako smo mogli pušćat da nan se ni dica ne znaju više smet
svaki je sam sebi dosta
svaki z bande je viška
... 
kada se dogodilo da smo pozabili romantiku
i za koga va kućami još držimo stol

                                       i katride!?


Elfrida Matuč-Mahulja/Krk 
Poetessa @ 18:30 |Komentiraj | Komentari: 20 | Prikaži komentare
nedjelja, prosinac 23, 2007



Danas van želin reć ovo:

http://www.lupiga.com/kolumna/kolumna.php?id=4959


Srićan van Božić i Novo leto od srca želin

ja z Bodulije - Ida!


Poetessa @ 16:47 |Komentiraj | Komentari: 22 | Prikaži komentare
utorak, rujan 4, 2007


kuća je stara
z odprtu puneštru
bokunić sriće.

          Elfrida Matuč-Mahulja/Krk
Poetessa @ 20:15 |Komentiraj | Komentari: 3 | Prikaži komentare
ponedjeljak, rujan 3, 2007


ti 
navigaš.
visoko kadi
te
moje oči
ne
vide.
navigaš
ti
prez kraja
je
more tvoje
ti
navigaš
a ja
istešo čekan
da mi
se
tornaš 
magare
znan
ti
moje zlato
zavavik
navigaš.

      Elfrida Matuč-Mahulja/Krk
 
Poetessa @ 20:12 |Komentiraj | Komentari: 9 | Prikaži komentare
četvrtak, kolovoz 2, 2007

                                                                          foto by Bojan Bonifačić/Punat

z bose noge po plićaku
kako dite hodin
more mi se smije -
nas dva skupa valjamo
obluci

opet san mića
i sve ću pozabit
ča nosi svit velih
ovdi na ovoj plaži
z tobu - more

opet san dite
i opet se igran
onako kako si me učilo prvo puno let -
išćen školjke va pesku
na istomu mestu

z bose noge po plićaku
postajen del od tebe
a ti mi se smiješ
i ja se tebi smijen -
sunce je z nami

valjamo šljunka kamičići
išćemo školjke ke san zabila ovdi
nikih pasanih let
opet san dite -
a ti si vavik TI

MORE!


E.M. Mahulja/Krk
Poetessa @ 21:19 |Komentiraj | Komentari: 5 | Prikaži komentare
srijeda, srpanj 25, 2007
ma da je tebe briga
sve ča san
ja
morda biš bil
na mene
potrošil

ku god besedu više

Image Hosted by ImageShack.us

i da moreš oćutit
od čega san
ja
ne biš bil ondat
kad si prvi put falil

još dva tri puti faljeval

istu stvar
a ja san
ča san

ma još vavik stojin
na istomu
mestu

E.M. Mahulja/Krk


Poetessa @ 21:24 |Komentiraj | Komentari: 3 | Prikaži komentare
nedjelja, srpanj 15, 2007



beseda isto more umrit
kako i čovik
pozabljena i sama...
ki zna koliko besed umire
svakoga dneva
besede ke više
nikomu ne rabe
kih se više niki ne domišlja
ke se ne govore
odjedanput više jih ni

besede z kimi je moje matere
mat
svoju dičinu spravljala
spat
uz ke su se imena ke danaska
na cimitru mučeć na kamiku stoje
zavavik skupa
nikad smele, kuševale
dokle su bile žive
dokle su bile mlade...
kako vi sada
besede ke na uho
nikad su se šapćale

besede ke meni danaska fale
da bin š njimi rekla sve
ča otila bin van reć
besede ke današnji mladi više
ne razume i va njih se ne intende
umiru pomalo
svakoga dneva
i jednoga dana sve će nestat

samo va kon libru
i va nikoj beloj glavi
još će jih se spominjat.

E.M.Mahulja/Krk

Poetessa @ 00:04 |Komentiraj | Komentari: 2 | Prikaži komentare
petak, srpanj 13, 2007

danas
poklen dugo let
moren zamislit da si samo
pesak
ki mi je kroz prsti stekal
kako vrime
i moren zamislit da si niš više
nego lahko perce
ko mi je vetar z ruke zel

ma još i danas
poklen tuliko let
moren zamislit ča god ću
vavik ću te z ničin sprid Boga
i sprid sebe opravdat
vavik ću za tebe skužu nać
valjda zato ča san te volila.

tebe
san volila.

             Elfrida Matuč-Mahulja/Krk


Poetessa @ 22:05 |Komentiraj | Komentari: 3 | Prikaži komentare
četvrtak, srpanj 12, 2007

ne bin se bila ni obrnula
već san bila odlučila
da gren ća
i da neću tu ostat
ma ti - ti
si me odlučil zazvat
z glason juga
ko se razbija va stene...


sve o meni već onda si znal
znal si kako me fermat
va svoju mrižu me ćapat
sad znan
da za vavik o tebi ću kantat
i ni mi žal
aš, kuliko god san
ja tvoja, tuliko si
i ti moj

škoj. Sve o meni znaš.
 

                  Elfrida Matuč-Mahulja/Krk


Poetessa @ 22:30 |Komentiraj | Komentari: 4 | Prikaži komentare
utorak, svibanj 29, 2007


pravi mi
kada si leh pozabil ćakulat
po domaću
i kako se to pozabi
ča i ti obraćeš z očimi kad
dosluhneš kako nigdi sopu sopile
i delaš se kako da nisi odovuda
ča se i ti sramiš
svojega jezika
spovidaj mi
ko ti se pijaža bit furešt 
va rojenon mestu
i kako se tada ćutiš
ča si i ti od onih ki će mi prit
glumit nike fine maniri
po kampanji i po komunadi
kako da nisi zrasal va štali
igrajuć se z jančići
i babi pobirajuć jaja od galebi
po škoju
ča si i ti naručil od Onoga 
domišljanje na novo pasano vrime
 
domišljaš se ti mene zapravo
ili više nisan komadić od
tvoga ditinjstva
ni ja.
 
                    Elfrida Matuč-Mahulja/Krk
Poetessa @ 09:58 |Komentiraj | Komentari: 11 | Prikaži komentare
ponedjeljak, svibanj 28, 2007


kad pade noć
ja mesto da spin
haban krik
mojega otoka
(po noći sve se
bolje čuje)
kriče gromače
kamik plače
va strahu su
oči raširile
drače
habaj!

šušanj
preletil je
prestrašeni kos
mislil se je odmorit
na grani ulike
a nje više ni
mislil je skočit
na tlo
ko više ni to
kadi je zemja i
kadi su bobice
ovo neš je oštro
i riže mu nožice
habaj!

celi božji dan
dokle god je bilo svitla
ovdi su niki judi
drobili gromaču
kamik priko puta
napravil je grimasu
i kriči, kriči
u noć, u noć
je kamik progovoril
i dozivlje pomoć
u kasnu noć
kad svi spe
kad ga niki ne čuje
samo ja
mesto da spin
haban
...
vapaj mojega otoka
i kako kamik plače
i kako kriče gromače
i kako su jako
va strahu
oči
raširile drače
haban

a glavu hitan šoto
kušina
z vetron me pohode
glasi
vani je južina
ne moren spat
niman mira
previše čujen
va 'vu kasnu uru
a niš ne moren
pomoć ne moren
kamiku
ni gromači
ni drači
samo 
haban
...

pomoć ne moren
mojemu otoku
umiri se
muč
i habaj! 
Samo pohabaj
habaj kako
ja haban
kamik ti ima
neš za reć...
 
 
                  Elfrida Matuč-Mahulja/Krk
Poetessa @ 10:13 |Komentiraj | Komentari: 4 | Prikaži komentare
nedjelja, svibanj 27, 2007


jugo je potiralo 
judi z rive
jugo je prolilo
kablić sive
na moj grad

galebi su zamučali
i nigdi se skrili
oblaki su mesto njih
odnikuda doletili

i svuda muk
i baš je mići
ov moj grad
kad more se razjadi.

                    Elfrida Matuč-Mahulja/Krk


Poetessa @ 19:54 |Komentiraj | Komentari: 5 | Prikaži komentare
Arhiva
« » stu 2017
  • p
  • u
  • s
  • č
  • p
  • s
  • n
  •  
  •  
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
Brojač posjeta
177960
Index.hr
Nema zapisa.